ក្រលេកមួយឆ្វាច់​ពីក្រៅពិតជាទាក់ភ្នែកជាមួយនឹងការតុបតែងហាងបែបសម័យជាមួយក្បាច់បុរាណខ្មែរលាយឡំនឹងគំនូរបែបទសវត្សទី 60 ព្រមទាំងពណ៌ស៊ីលាបដ៏ស្រស់ឆើតឆាយ​នៅលើដងផ្លូវជិតផ្សារចាស់ក្រុង​សៀមរាប​ ប៉ុន្ដែអ្នកនឹងឆ្ងល់ព្រោះថាហេតុអ្វីបានដាក់ឈ្មោះជា​ Lounge បើមើលទៅគ្រាន់តែជាហាងកាហ្វេដ៏តូចច្រឡឹងមួយហ្នឹង? នេះគឺដោយសារ Menaka Lounge មិនមែនគ្រាន់តែជាអ្វីដែលអ្នកបានឃើញ​នោះទេ​។

Menaka Lounge​ គឺជា speakeasy bar ដែលជាប្រភេទបារបង្កប់ខ្លួន​ និងឈ្មោះត្រូវបានដាក់តាមអប្សរាដ៏ស្រស់ស្អាតដាច់គេមួយអង្គ​កាលពីសម័យអង្គរ។​ បារនេះពេលថ្ងៃត្រឹមជាហាងកាហ្វេ    ប៉ុន្តែចាប់ពីម៉ោង 6 ល្ងាចទៅ​ ភ្ញៀវអាចធ្វើដំណើរឆ្លងកាត់ទ្វារកញ្ចក់ដ៏ធំនៅចំពីក្រោយហាងកាហ្វេដ៏តូចច្រឡឹងមួយនេះដើម្បីឡើងទៅកាន់បរិវេណ Lounge ដ៏ពិសេសមួយ​។ ប្រិយមិត្តដែលមិនធ្លាប់ទៅបរិវេណខាងលើប្រហែលជាឆ្ងល់ហើយថាហេតុអ្វីគេដាក់ទ្វារកញ្ចក់ធំៗម៉្លេះ​ ឥឡូវអស់ចម្ងល់ហើយមែនទេ?

នៅបរិវេណហាងកាហ្វេខាងក្រោម Menaka Lounge មានបម្រើជាភេសជ្ជ:​ កាហ្វេ​ និងម្ហូបផ្សេងៗ​បែបខ្មែរ​និងអាស៊ី ទាំងអាហារពេលព្រឹក​ ថ្ងៃត្រង់​ និង​ ល្ងាច។ ក្រុមការងារ FoodBuzz បានភ្លក្ស Menaka Curry​ ដែលជាសម្លរការីសាច់មាន់ដ៏មាន​​ឱជារស​ ជាពិសេសខ្ទិះឡើងខាប់ត្រូវចិត្តពួកយើងតែម្ដង​ ហើយរសជាតិហឹរតិចៗល្មម​ និងមានក្លិនឈ្ងុយ ញ៉ាំជាមួយបាយរំស្លឹកចេក ដែលប្លែកមិនដែលប្រទះពីមុនមក។​ បន្ថែមជាមួយនឹងតែជ្រក់មួយកែវទៀតនោះ ​គឺល្មមនឹងរួចរាល់សម្រាប់ការទទួលយកបទពិសោធន៍ Lounge លាក់ខ្លួននៅខាងលើ​។

គ្រាន់តែដើរកាត់ទ្វាកញ្ចក់ដ៏ធំនេះភ្លាម ​(ដែលប្រិយមិត្តអាចចំណាយពេលបន្ដិចដើម្បីសារ៉េសក់​ ថែម lipstick ឬថតរូបលេងអីតិចសិនក៏បាន​) លោកអ្នកនឹងឃើញ Bar ​ធ្វើភេសជ្ជ:តូចមួយ​ និងជណ្ដើរ​ឡើងទៅកាន់ជាន់ទីមួយ​។ ប្រិយមិត្តនឹងភ្ញាក់ផ្អើលនឹង Lounge នេះជាមួយនឹងការតុបតែង និងបរិយាកាសដ៏ខុសប្លែកដាច់ពីបារផ្សេងៗទៀតដែលនៅ Pub Street ដូចគ្នានេះមិនខាន។

បារពណ៌ឈាមជ្រូកក្រម៉ៅ ព្រមនឹងពន្លឺភ្លើងដ៏ស្រទន់ លំអដោយផ្ទាំងរូបគំនូរចំរៀងសម័យអធិរាជសម្លេងមាស​ និងរូបគំនូរអប្សរាដ៏ស្រស់ស្អាតលើជញ្ជាំង​នេះពិតជានឹងធ្វើឲ្យអ្នកមានអារម្មណ៍ប្លែកបែបស្ងប់ស្ងាត់​ ហើយអ្នកនឹងទទួលស្វាគមន៍ដោយបុគ្គលិកដ៏រួសរាយរាក់ទាក់ជាមួយនឹងម៉ឺនុយភេសជ្ជៈដូចព្រះរាជសារ​របស់ស្ដេចយ៉ាងស្អាតនិងគួរឲ្យចាប់អារម្មណ៍ភ្លាម។​

ចំណែកឯភេសជ្ជ:នៅទីនេះ គឺមានបែងចែកជា 3 សម័យកាល​ដូចជា​ “Angkor Era”, “The Sangkum Era” និង “The Great Era” ហើយភេសជ្ជៈនីមួយៗសុទ្ធតែមានឈ្មោះពិរោះៗ និងប្លែកលាយឡំនឹងពាក្យពេចន៍ខ្មែរ។ ​នៅលើមឺនុយនេះក៏មានជាកូដពណ៌ដែលអ្នកអាចមើលដឹងពីកំរិតភាពផ្អែម​ ភាពខ្លាំង​ ភាពជូរ​ និងស្រស់ស្រាយរបស់ភេសជ្ជ:នីមួយៗទៀតផង។ អ្នកក៏អាចឲ្យ​ខាង Menaka Lounge ណែនាំភេសជ្ជ:ដែលសាកសមនឹងអ្នកផងដែរ​។

ស្របពេលដែលលោកអ្នកកំពុងតែរីករាយជាមួយនឹងភេសជ្ជ: និងបណ្ដែតអារម្មណ៍តាមចង្វាក់ភ្លេងដ៏អន្លង់អន្លោចនេះ​ អ្នកក៏អាចកុម្ម៉ង់ចំណីផ្សេងៗញ៉ាំក្លែមនឹងភេសជ្ជៈ ​ និងចុងក្រោយកុំភ្លេចផ្ដិតយករូបភាពស្អាតទុកចែករំលែកផ​ងណា! អ្នកណាថាឲ្យតែទៅ Pub Street ដឹងតែត្រូវចូលបារដែលមានភ្លេងលឺៗនិងមនុស្សច្រើនប្រជ្រៀតគ្នា? សាក Menaka Lounge ម្ដងមើល!

ទីតាំង៖ ផ្ទះលេខ 275​, ផ្លូវ 2 ធ្នូ​​, ទល់មុខផ្សារចាស់ក្រុងសៀមរាប | Googlemap 

បើកពីម៉ោង៖

• 7:30AM - 11PM (សំរាប់កាហ្វេ)
• 6PM – 1AM (សំរាប់ Lounge)